In tal plen dal unviâr, di cuant che al omp al ê su le tiare, al brame di vê un fûc dulà scjaldâsi, e alore ancje se al dì di vue le’ cjasis e àn i termosifons, pal omp e jè ancjemò restade le voe di metisi dongje di une flame par fâ lâ vie i sgrisulons di frêt e par stâ insieme. Eco parcè che le fieste de Pifanie no je muarte e le int e vâ fûr di cjase in plen unviâr.
Cussì in dutis le’ bandis dal Friûl, te Basse, tal plan, in culine e in te’ monts, le tradizion dal pignarûl no je stade metude in bande, anzit ducj i agns si rinove cun simpri plui partecipazion di int, e alore, fruts cun paris, maris e nonos e van fûr di cjase cul prin scur par lâ a viodi al pignarûl. Zaromai di cualchi an ancje a San Zorz, a le Pifanie si fâs le fieste lajù de Canoe sù le rive dal flun Cuâr dulà che si rinove le tradizion in tun mûd un pôc speciâl, parcè che le fieste si fâs dongje de aghe. Sicome c’o sin te Basse, no puedevin fâle in culine dulà che le’ flamis dal pignarûl si puedin viodi di lontan, ma si à sielzut di fâle dongje de aghe parcè che ancje culì e son dai vantaçs. Se chei de’ culinis e viodin le’ flamis di lontan, nô, le’ flamis les viodin dos voltis, parcè che le aghe e fâs di spieli e cussi o viodìn le’ flamis dal pignarûl che van sù tal cil e chês dai rifles de aghe. O podìn disi che nô de Basse o sin furtunats parcè che cun dutis chistis flamis o stin ancjemo plui cjalds. Ancje le Befane e a capit al vantaç che si â inte Basse, e ducj i agns e ven vulintir di chistis bandis parcè che cussi e cjape sù un pôc dal clip che i fasin le’ flamis de aghe cence vê al pericul di brusignasi. Cussi, in barcje, jê e ven fûr de flamis che si viodin inte aghe, e atrache tal puntîl che i fruts de canoe e usin par lâ fûr a fâ le’ garis, e, e dismonte partant un sac plen di bonbons pai fruts di San Zorz, Vilegnove, Nojâr e altris paîs de Basse, ju fâs biei e contents.
Chiste sturiute e je stade scrite pai fruts dal Sanzurzin, e ancje le puisie culì sot e je par lôr.
